மலையும் மழையும்

மதிநின்று விளையாடும் மலைமீது தொடுமேகம்
மழை கொண்டு நீர்தூவுமாம் - வளர்
புதிதென்ற மலைவாழை இலைதள்ள அதுகொண்ட
பசுஞ்சோலை எழில் கொள்ளுமாம் - ஒரு
முதிதான மரமொன்றில் கிளைநின்ற குயில்பாட
மலர்க்கூட்டம் இதழ் பூக்குமாம் - தொங்கி
குதித்தோடிக் கிளைதூங்கி கருமந்தி மரந்தாவ
குளிர்நீரும் பூத் தூவுமாம்

அழியாத கலையோடு பெருங்கோவில் அமைந்தொன்று
அழகோடு உயர்ந்தோங்கவே - ஓடி
வழிமீது நடுவானில் வரும்மேகம் இடைநின்று
விடு என்று அதை மோதுமாம் - மெல்ல
விழி ஏய்க்குங் குளிர்காற்று வெண்பஞ்சு உடல்நீவ
வளைந்தோடி முகில் ஓடுமாம் - போலும்
எழிலான பலநூறில் எது தானும் அழகென்று
இசைபாட அருள்தேவியே

மழைவந்து நிலம்மீது உறவாடும் மணல்சேர
மண்வாசம் எழும் கண்டுமே - எங்கும்
நுழைந்தோடு பூங்காற்று அதையள்ளி மணம்வீசி
நனிபூவை மறந்தோடுமே - நின்று
வளைந்தாடும் கொடிபூத்த வகையான மலர்த்தேனில்
விழுந்தூறல் கலந்தோடவே - அங்கு
அழைந்தின்ப மதுவுண்ணும் இளந்தும்பி சுவையின்றி
அருந்தாம லெழுந்தோடுமே

குழல்மீது மலர்கொண்ட குறும்பார்வை தனிலன்பு
கொள்நங்கை தனை ஆடவன் - அவள்
சுழல்அம்பு விழிகண்டு சிந்தும்புன் னகையன்ன
சுடர்தானும் புவிமாதினை - சொட்டு
மழை நின்ற பெருவானில் கருமேகமிடையாலே
மறைந்தங்கு ஒளிசிந்தவும் - வந்த
மழைபோகச் சிறு தூறல் தனில்ஏழு நிறமோடி
இதுவண்ணம் வாழ்வென்குமே

பிழையான குரு பாடம் பயிலாத சிறுபாலன்
படுகின்ற துயராகவே - நடை
பழக்காத ஒருமாடு நடுவீதி தடுமாறிப்
பிரம்பாலே வெருண்டோடுமே - கொள்
முழவோடு சிறுநாத மிசைபாடிஒருகூட்டம்
மெதுவாக நடைகொள்வதும் - காண
அழகோடி எமதான மலைகூடும் சிறுஊரில்
அருங்காட்சி தினம் தோறுமே!

-கிரிகாசன்