பூமியில் பிறந்து வாடா

பூமியில் பிறந்து வாடா
புண்ணியம் செய்து வாடா
பொருளையே கொடுத்து வாடா
புகழையே சேர்த்து வாடா

வாடாத மலரைச் சொரிந்து
பாடாத பாட்டைப் பாடி
தேடாத பதத்தில் விழுந்து
கோடாத மனமே பெற்று வாடா

பெற்றவர்தம் நிழலில் வாழ்ந்து
உற்றவர்தம் உறவில் மிளிர்ந்து
கற்றவர் தம் அறிவைப் பெற்று
நற்றவத்தவர் வழியில் நிற்பாயடா

நடப்பதும் நிற்பதும் அவன் செயல்தானடா
கிடப்பதும் அலைவதும் சிவனருளேயடா
கொடுப்பதும் கொள்வதும் உன்கையில்தானடா
எடுப்பதும் விடுப்பதும் உன்திறனிலேயடா

மானிடப் பிறவி எடுத்தாய் நீயடா
மாணிக்கமாய் ஒளிர்ந்திடுவாய் இனியடா
மாபெரும் மனிதரைப் போல் தானடா
மாண்புடனே வாழ்ந்து நிற்பாய் பாரடா

பூமியில் ஒரேமுறைதான் காலடி நீ வைப்பாய்
பூவொன்று ஒரே நாளில் தன் வாழ்வை நன்றாய்
மணம்பரப்பி முடித்துக் கொள்ளுமாப் போலே-தமிழ்
மணம் பரப்ப நீயும் மனங் கொள்ளுவாயடா

எத்தனை மொழிகள் கற்றாலும் நீ
எத்தனை நண்பர்கள் பெற்றாலும்
தமிழ் மொழி காட்டும் பண்பினையே
தரணியில் வேறெங்கும் காணாயடா

எனவே பூமியில் பிறந்து வாடா
தமிழனாய் நடந்து வாடா
பொறுமையை பெருக்கி நாளும்
பெருமையைப் போற்றி வாடா